गएको हप्ता नेपाली रजतपटको लागी उपलब्धि मूलक नै रह्यो । चलचित्र सम्बन्धी विविध कार्यक्रम अनि चलचित्रका प्रचारप्रसार सामाग्री रिलिज, यिनै बिच नेपाली रजतपटको गत हप्ता गुज्रियो । चलचित्र क्षेत्रमा सानोतिनो उत्सव त जहिल्यै भइरहेकै हुन्छ । यसै गरी गएको हप्ता पनि नेपाली कला र समग्र चलचित्र क्षेत्रले आफ्नो गति लिइरहन सफल भयो । हेरौँ तस्बिरमा यो हप्ता ।
चलचित्र 'सेन्टी भाइरस'को ट्रेलर सार्वजनिक भएको छ । हास्य कलाकार तथा समाजसेवी धुर्मुस-सुन्तलीको जोडिले चलचित्र निर्माण गरेको चलचित्रको ट्रेलर बुधवार सार्वजनिक गरिएको हो । गौतम बुद्ध अन्तर्राष्ट्रिय रङ्गशाला निर्माण अभियानका लागि बनाइएको भनिएको चलचित्रको ट्रेलरमा रङ्गशाला को प्रचार गरिएको छ । ट्रेलरमा राजनीति, सामाजिक संरचना, पारिवारिक द्वन्द्व र राजनीतिले कसरी एउटा व्यक्तिको व्यक्तिगत जीवनमा उतारचढाव ल्याउँछ भन्ने देखाइएको छ ।
सोमवार प्रहरीको सम्पर्कमा आएकी गायिका आस्था राउतलाई जिल्ला अदालत काठमाडौँले चार दिन म्याद थप गरेको थियो । अनुसन्धानका लागी प्रहरीलाई चार दिन म्याद थप गरिएपछि उनी अब चार दिन प्रहरी हिरासतमै बस्नुपर्ने भनिएको थियो । तर राउतलाई धरौटीमा छाड्न जिल्ला प्रशासन कार्यालय, काठमाडौँले आदेश दिएको छ । मंगलबार भएको थुनछेक बहसपछि जिल्ला प्रशासन कार्यालय काठमाडौं प्रमुख जिल्ला अधिकारी जनकराज दाहालले चार हजार रुपैयाँ धरौटी लिएर रिहा गर्न आदेश दिए । त्यसपछि सो आदेशअनुसार धरौटी बुझाएर आस्था रिहा भएकी हुन् ।
चलचित्र ‘षट्कोण’ को प्रदर्शन मिति घोषणा गरिएको छ । सरस्वती पूजाको अवसर पारेर निर्माण टिमले बिहीबार प्रदर्शन मिति सार्वजनिक गरेको हो । योसँगै चलचित्र आगामी वर्षको वैशाख १९ गते प्रदर्शनमा आउनेछ । मिलन डी. काप्रीको निर्देशन रहेको फिल्मको पोस्टरमा आत्महत्या गर्नका लागि रुखमा डोरी बाँधिएको देख्न सकिन्छ जसको मुनी एक व्यक्ति उभिएका छन् ।
चलचित्र ‘म यस्तो गीत गाउँछु २’ को तेस्रो गीत सार्वजनिक भएको छ । बिहीबार ‘कसम कसम’ बोलेको डान्सिङ गीत सार्वजनिक गरिएको हो । गीतमा सुगम पोखरेलको स्वर, दिनेशराज पुरीको शब्द र अर्जुन पोखरेलको सङ्गीत रहेको छ । चलचित्रको सार्वजनिक गीतको भिडियोमा चलचित्रका प्रमुख अभिनेता पल शाह र अभिनेत्री पूजा शर्मासँगै मोडल अलिशा शर्मा फिचर्ड छन् ।
निर्देशक दीपेन्द्र लामाको निर्देशनमा नयाँ चलचित्र ‘२ नम्बरी’ निर्माण हुने भएको छ । चलचित्रमा दयाहाङ राई र पल शाह सहकार्य गर्दै छन् । आ-आफ्नो जेनेरेसनमा एउटा छुट्टै पहिचान र दर्शकको मन जितेका यी दुई अभिनेता चलचित्रमा साथीको भूमिकामा देखिँदै छन् । पहिलो पटक स्क्रिन साझेदारी गर्न लागेका दुवै अभिनेता उत्साहित भएको बताउँछन् ।
गौतम बुद्ध अन्तर्राष्ट्रिय क्रिकेट रङ्गशाला निर्माणमा सहयोगार्थ ग्वस्वारा हुलाक कार्यालयले सहयोग हस्तान्तरण गरेको छ । हुलाकका कर्मचारीले केही दिनको खाजा खर्च कटाएर सङ्कलन गरेको रकम बुधवार ‘धुर्मुस सुन्तली फाउन्डेसन’का अध्यक्ष तथा कलाकार सिताराम कट्टेललाई हस्तान्तरण गरियो । रकम हस्तान्तरण कार्यक्रममा बोल्दै सितारामले यसरी सहयोग जुट्दा आफूलाई थप जिम्मेवारी बोध हुने बताए ।
गायक सुगम पोखरेलको सातौँ गीति सङ्ग्रह (श्वेत हंसिनी ) मा समावेश शीर्ष गीत सरस्वती वन्दना सार्वजनिक गरिएको छ । सरस्वती पूजाको अवसर पारेर सार्वजनिक गरिएको गीतमा शब्द तथा सङ्गीत गायक सुगम कै रहेको छ । भने सङ्गीत संयोजन शैलेन्द्र बाबु प्रधानले गरेका छन् । पछिल्लो समय आफ्नो गीत सङ्गीतमा फरक फरक पन दिइरहेका सुगमको यस गीत पनि फरक रहेको छ ।
देव कुमार श्रेष्ठ निर्देशित फिल्म ‘दि कर्मा’ को च्यारिटी सो सम्पन्न भएको छ । यही शुक्रवारबाट देशैभर प्रदर्शनमा आउन लागेको एक्सन लभ स्टोरी चलचित्रमा परमिता आरएल राणाको मुख्य भूमिका रहेको छ । मङ्गलवार विग मुभिजमा आयोजित च्यारिटी सो नेपाल चलचित्र कलाकार सङ्घको सहयोगार्थ गरिएको हो । च्यारिटीशो बाट सङ्कालीत रकम कलाकार संघलाई प्रदान गरिएको निर्माता जय राज रायले बताए । च्यारिटी शोमा चलचित्र निर्देशकदेखि कलाकारहरू सम्पूर्ण उपस्थित भएका थिए । भने चलचित्र हेर्न पुगेका कलाकार र दर्शकले चलचित्र राम्रो बनेको बताएका छन् ।
नायिका प्रियंका कार्की र अभिनेता आयुष्मान देशराज जोशीको विवाहको मिति पक्का भएको छ । उनीहरू यही फागुन १७ गते वैवाहिक जीवनमा बाँधिँदै छन् । विवाहको लागी टिका टाला गरेको पनि दुई वर्ष पछि उनीहरू को विवाहको मिति तोकिएको हो ।
चलचित्र 'मन परेसी' को शुभ मुर्हत गरिएको छ । बिहीबार बिहान भद्रकाली मन्दिर परी सरमा चलचित्रको मुर्हत गरियो । चलचित्रको मुर्हतमा चलचित्रमा नायिका पूजा शर्मा र आकाश श्रेष्ठ उपस्थित भएका थिए । एक पछि अर्को चलचित्रमा देखिइरहेका पूजा आकाशको जोडी यस चलचित्रमा पनि रोमान्स गर्दै छन् । एक्सन लभ स्टोरी जनरामा निर्माण हुने चलचित्रमा पूजा आकाशका साथमा कालु राणा रबिन्द्र झा बुद्धि तामाङको पनि अभिनय रहने छ ।
हास्य कलाकार तथा समाजसेवी धुर्मुस-सुन्तलीको जोडिले चलचित्र निर्माण गरेको चलचित्र 'सेन्टी भाइरस' यही फागुन ९ गते देखि प्रदर्शनमा आउँदै छ । केही समय अघि 'फनफनी' बोलको गीत सार्वजनिक गरिएको चलचित्रको यति बेला प्रचारप्रसार कार्य अघि बढिरहेको छ । यसैबिच उपत्यका ट्याक्सी व्यवसाय सङ्घले चलचित्रको प्रचार प्रसारमा सहयोग पुर्याउने उद्देश्यले उपत्यकाका हरेक ट्याक्सीमा पोस्टर टाँसिएको छ । सोमबार बिहान एक कार्यक्रमबिच धुर्मुस अर्थात् सिताराम कट्टेलले ट्याक्सीमा पोस्टर टाँसेर कार्यक्रमको सुरुवात गरेका थिए ।
हास्य कलाकार विल्सन विक्रम राईलाई पुत्र लाभ भएको छ । विल्सन विक्रम राई (तक्मेबुढा)को जन्मदिनकै दिन उनलाई पुत्र लाभ भएको हो । सन् १९८७ जनवरी २९ तारिखका दिन झापामा जन्मेका राईले ३४ औँ जन्मदिन मनाए । यसै दिन छोराको जन्म भएसँगै जन्मदिन तक्मेबुढाका लागि विशेष बन्यो । उनले बुधवार बिहान सामाजिक सञ्जालमा आफ्नो जन्मदिनमा छोरा जन्मेको र बाबु बन्न पाएकोमा निकै खुसी भएको बताएका थिए ।
कलाकार शिवहरि पौडेलको निर्देशनमा बन्ने चलचित्र ‘लक्का जवान’को दोस्रो गीतको छायाङ्कन भएको छ । चलचित्रको 'मुसुक्क हाँसन माया' बोलको गीतको छायाङ्कन गरिएको हो । गीतमा प्रियंका कार्की, दिलीप रायमाझी, सलोन बस्नेत, वर्षा सिवाकोटी, किरण केसी, राजाराम पौडेल, शिवहरि पौड्याल लगायत कलाकारले कम्मर मर्काएका छन् ।
मिथिला शर्मा र सुरक्षा पन्तको मुख्य भूमिका रहेको चलचित्र 'आमा'को शीर्ष गीत रिलिज भएको छ । ‘मनको मौलोदेखि मन्दिरसम्म’ बोलको गीत बिहीबार सार्वजनिक गरिएको हो । केतन क्षेत्रीको स्वर रहेको गीतमा भूपेन्द्र खड्काको शब्द र सुवाष भुसालको सङ्गीत रहेको छ । सार्वजनिक मार्मिक गीत को भिडियोमा चल अचल दृश्य समावेश गरिएका छन् । दिपेन्द्र के खनाल निर्देशित चलचित्रको गीतमा आमाले आफ्नो सन्तानका लागि गर्ने सङ्घर्षलाई मार्मिक तरिकाले प्रस्तुत गरिएको छ ।
सौरभ चौधरीको निर्देशनमा बनेको चलचित्र ‘लभ डायरिज’ नेपालसँगै अस्ट्रेलियामा पनि प्रदर्शन हुने भएको छ । सुशील श्रेष्ठ स्टारर सिनेमा ‘लभ डायरिज’ भ्यालेन्टाइन डे अवसर पारेर प्रदर्शनमा आउँदै छ । भ्यालेन्टाइन डे कै दिन अस्ट्रेलियामा 'नाइन मिल क्याफे र सल्भ एजुकेसन कन्सल्टेन्सीले चलचित्र प्रदर्शन गर्दै छन् ।
पछिल्लो समय एक पछि अर्को गर्दै नेपाली अभिनेत्रीहरूले विवाह गर्दै छन् । भर्खर अभिनेत्री प्रियंका कार्कीको विवाह मिति तोकियो । यसै बिच अभिनेत्री आँचल शर्माको पनि विवाह हुने पक्का भएको छ । केही समय यता प्रेममा रहेकी उनी प्रेमी उदिप श्रेष्ठसँग वैवाहिक जीवनमा बाँधिँदै छिन् । उनको यही फागुनको अन्तिम अर्थात् २५ देखी २७ को बिचमा विवाह हुने बुझिएको छ । उनले शुक्रवार आफ्नो परिवारसँग हुनेवाला दुलही भन्दै केक काटेकी छिन् ।
बक्स अफिसमा हिट मानिएको सिरिज चलचित्र ‘नाई नभन्नु ल’को छैटौँ सिरिज पनि बन्ने भएको छ । निर्देशक तथा लेखक विकासराज आचार्यले यसको जानकारी दिएका हुन् । उनले अहिले चलचित्रको स्क्रिप्ट र सङ्गीतमा काम भइरहेको बताएका छन् । वैशाखको दोस्रो साताबाट फ्लोरमा जाने तयारी विकाशको छ । उनले चलचित्रमा सलोन बस्नेत, बाल–कलाकार अनुभव रेग्मी र सेड्रिना शर्मा पक्का भैसकेको बताएका छन् ।
चलचित्र ‘मन्त्र’को फर्स्ट लुक पोस्टर सार्वजनिक भएको छ । सौगात मल्ल स्टारर चलचित्रलाई खिल बहादुर गुरुङले निर्देशन गरेका हुन् । लभ स्टोरी जनरामा निर्माण भएको चलचित्रको सार्वजनिक पोस्टरमा कुनै पनि कलाकारलाई स्थान दिइएको छैन । निर्माण पक्षका अनुसार चलचित्रले हिमाली भेगको प्रेम कथा बोकेको छ । चलचित्रमा सौगात मल्ल,बुद्धि तामाङ,दिया पुन,नमिता घिसिङ,बिर बहादुर लामाको मुख्य भूमिका रहेको छ ।
बक्स अफिसमा हिट मानिएको सिरिज चलचित्र ‘नाई नभन्नु ल’को छैटौँ सिरिज पनि बन्ने भएको छ । निर्देशक तथा लेखक विकासराज आचार्यले यसको जानकारी दिएका हुन् । उनले अहिले चलचित्रको स्क्रिप्ट र सङ्गीतमा काम भइरहेको बताएका छन् । चलचित्रमा सलोन बस्नेत, बाल–कलाकार अनुभव रेग्मी र सेड्रिना शर्मा पक्का भैसकेका छन् । यसैबिच ‘नाईं नभन्नू ल ५’ का मुख्य बाल अभिनेता अनुभव र सेड्रिना मुख्य भूमिकामा प्रस्तुत हुनेछन् ।
मिलन चाम्सको निर्देशनमा चलचित्र ‘गोर्खा वारियर’ बन्ने भएको छ । वीर गोर्खालीको कथामा निर्माण हुने चलचित्र लन्डन सिने आइ प्रोडक्सनको ब्यानरमा निर्माण हुने छ । चाँडै छायाङ्कन सुरु हुने चलचित्रको बजेट २० करोड बढी रहेको बताइएको छ । चलचित्रमा कलाकारको रूपमा दयाहाङ राई, प्रशान्त तामाङ, वर्षा सिवाकोटी, बुद्धि तामाङ, विजय लामा, माओत्से गुरुङ, कविता आले, रुपा पुन फाइनल भएका छन् ।
हास्य कलाकार तथा गायक मदनकृष्ण श्रेष्ठ र उनकी छोरी सराना श्रेष्ठको आवाजमा नयाँ गीत सार्वजनिक भएको छ । मदन र सरानाले पहिलो पटक एउटा गीतमा आवाज भरेका हुन् । 'पानी छाया' बोलको गीत काठमाडौँमा एक कार्यक्रमको आयोजना गरी सार्वजनिक गरिएको हो ।
